Hiwaga sa Likod ng Larawan

Bente pesos na pose.

Lubos ang aking pagkadismaya sa nangyayari sa lipunan, kaya ipinasya kong pasukin na lamang ang mundo ng pagpipinta. Inihanda ko na ang kanbas, pintura at iba pang kagamitan sa pagpinta. Feeling artist na tuloy ako nito. Nagsimula ako sa pagpinta ngunit tila walang kalatoy-latoy ang nalikha kong larawan. Ngawit na ang modelo at irita na sa pabago-bagong pose na pinagawa sa kanya ngunit walang matinong sketch na nagawa. Tulad ng napagkasuduan, binayaran ko pa rin ng bente pesos ang modelo sa kanyang effort. Bagaman tinanaw n’yang malaking utang na loob ang bente pesos ay humirit ako ng isang huling pose. Pumayag naman si Modelo at nag-overtime nang walang karagdagang bayad.

Todo ang konsentrasyon ko dahil ayaw kong mapahiya sa modelo. Ngunit ayaw gumalaw kamay ko. “Masyado ka namang demanding.” Nanlaki ang aking mga mata nang marinig kong magsalita si Kamay. Aba! May buhay siya. “Masyado ka kaseng nagpapapaniwala sa mga guro ng sining. Ang pagbuo ng konsepto ay hindi sa lebel lamang ng utak. Hayaan mo akong mag-isip para sa ‘yo, bobo.” Na hurt ako d’un. Tinawag niya akong bobo. Gayunpaman, iginawad ko sa kanya ang minimithing independence at hinayaan ko s’yang gumalaw.

Aba! Gumalaw nga mag-isa si Kamay. At madamdamin ang kanyang pagguhit. Doon ko natanto na nasa kutob at hindi sa rason ang ganda ng sining, nasa piglas ng instinct at hindi sa tatag ng kamay. Unti-unti, nabuo ang larawan. Masaya ako sa resulta at pinauwi ko na ang modelo na tuwang-tuwa sa talent fee n’yang bente pesos.

Di ako makapaniwala na nagawa ko ang piyesa. Napatitig ako sa larawan. Maging ako ay di maarok ang ibig sabihin ng kanyang hugis. Sa aking pagtitig ay pumaimbulog ako sa misteryo ng aking pagkatao na nakintal sa kanbas, sa mga damdamin at memorya na hirap apuhapin sa dagat ng mga lumulutang na ideya. Dinig ko bawat pintig, hikbi at panaghoy. Ramdam ko ang init at lamig ng di maipaliwanag na damdamin. At nilamon ako ng nagpupuyos na unos ng galit at pangamba.

Naputol ang aking pagmumuni nang may mapansin akong kakatwa sa larawan; isang misteryong tanging si Kamay lamang ang makapagpapaliwanag. Tinimbang-timbang ko ang mga pangyayari, pinagtagni-tagni ang mga naging proseso. Ngunit nanatiling hiwaga pa rin sa ‘kin…    …kung bakit naging KAMUKHA NI DIEGO ANG NASA LARAWAN.

Kabanata 15 ng seryeng kwentong dagta